गालीलको काना नगरमा एउटा विवाह थियो ।’ —यूहन्ना २:१
येशूले पानीलाई दाखमद्यमा परिणत गर्नुभएको कथाबारे विचार गरौं । यो उहाँको पहिलो आश्चर्यकर्म थियो, र यसले हाम्रो जीवनमा उहाँले कसरी काम गर्नुहुन्छ भन्ने कुरा प्रकट गर्दछ । (१) येशूलाई निम्तो दिनुहोस् । ‘तेस्रो दिन गालीलको काना नगरमा एउटा विवाह थियो…येशू र उहाँका चेलाहरू पनि विवाहमा निम्त्याइएका थिए’ (पद १–२) । समस्या उत्पन्न हुँदा, यो जोडीले येशूलाई बोलाउन पठाउनु परेन किनभने उहाँ पहिले नै त्यहाँ हुनुहुन्थ्यो । तिनीहरूले उहाँलाई चिनेका मात्र होइनन्, तिनीहरूले उहाँलाई आफ्नो योजनामा पनि समावेश गरे । तिनीहरूले उहाँको आदर गरे । पावलको ह्दयको पुकार ‘म उहाँलाई चिन्न सकूँ’ (फिलिप्पी ३:१०) भन्ने थियो । किन ? किनकि जब तपाईं प्रभुलाई चिन्नुहुन्छ, तपाईं उहाँलाई साहससाथ पुकारा गर्न सक्नुहुन्छ र तपाईंलाई उहाँको आवश्यकता पर्दा उहाँ तपाईंको साथमा हुनुहुनेछ भनी विश्वस्त हुन सक्नुहुन्छ । सायद यी दम्पतीले यो कार्यक्रमको लागि तयारी गर्न लामो समय पाएका हुन सक्थे, तापनि येशूले राम्ररी योजना नगरेको लागि तिनीहरूको आलोचना गर्नुभएन । उहाँले तिनीहरूलाई सहायता गर्नुभयो र तिनीहरूको आवश्यकता पूरा गर्नुभयो । अनि उहाँले तपाईंको लागि पनि त्यसै गर्नुहुनेछ; तपाईंले गर्नुपर्ने काम भनेको उहाँलाई निमन्त्रणा गर्नु मात्रै हो । (२) तपाईंले नबुझ्नुहुँदा पनि उहाँले तपाईंलाई जे भन्नुहुन्छ त्यही गर्नुहोस् । विश्वासलाई व्याख्याको आवश्यकता पर्दैन । यसको लागि सरल आज्ञाकारिता र परमेश्वरको भलाइमा भरोसा चाहिन्छ । ‘परमप्रभुमा आनन्दित होऊ, र उहाँले तिम्रो मनोरथ पूर्ण गर्नुहुनेछ । आफ्नो मार्ग परमप्रभुलाई सुम्प, उहाँमा नै भरोसा राख, अनि उहाँले यो गर्नुहुनेछ’ (भजन ३७:४–५) । (३) परमेश्वरले उत्तम कुरालाई अन्तिम समयको लागि बचाइराख्न सक्नुहुन्छ भन्ने कुरा बुझ्नुहोस् । ‘तिमीले त असल दाखमद्य अहिलेसम्म राखिछोडेछौ ¤’ (यूहन्ना २:१०) । धेरै ढिलो भएको छैन । जुन कुरा तपाईंलाई दुःखद जस्तो देखिन्छ त्यो तपाईंको जीवनमा परमेश्वरको भलाइ र विश्वासयोग्यताको गवाही बन्न सक्छ ।यसकारण, आश्चर्यकर्मको लागि येशूको उपस्थिति खोज्नु अनि परमेश्वरमा भरोसासाथ आज्ञापालन गर्नु जरुरी छ ।
आत्मिक भोजनः १ इतिहास १२:२३–१५:२९ लूका १२:३५–४८ भजन ११९:३३–४० हितोपदेश २०:२८–३०
The Word for Today is authored by Bob and Debby Gass and published under licence from UCB International Copyright © 2024
