‘तर भिडहरूलाई देखेर उहाँको ह्दय तिनीहरूका निम्ति दयाले भरियो ।’ —मत्ती ९:३६
जब तपाईं आत्म–केन्द्रित रस्वार्थमा सीमित हुनुहुन्छ, आवश्यकतामा परेका मानिसहरूलाई बेवास्ता गर्न र कुनै चासो नदेखाउनु सजिलै हुन्छ । तर जब तपाईं आफ्नो जीवन ख्रीष्टमा समर्पित गर्नुहुन्छ र उहाँको पाइलामा पछ्याउने निर्णय गर्नुहुन्छ, त्यो परिवर्तन हुन्छ । ‘तर भिडहरूलाई देखेर उहाँको ह्दय तिनीहरूका निम्ति दयाले भरियो । किनभने तिनीहरू गोठालाविनाका भेडाहरूजस्तै हैरान र असहाय भएका थिए । तब उहाँले आफ्ना चेलाहरूलाई भन्नुभयो, “फसल प्रशस्त छ, तर खेतालाहरू थोरै छन् । यसकारण फसलका प्रभुलाई प्रार्थना गर, र उहाँले आफ्नो फसलमा खेतालाहरू पठाइदेऊन्”’ (पद ३६–३८) । ‘हैरान’ मानिसहरूले येशूको ह्दयलाई छोए । जीवनको तनावले तिनीहरूलाई थकाएको थियो र तिनीहरूले बोकेका बोझहरू गह्रौ थिए । असहाय मानिसहरू देख्दा पनि उहाँको ह्दय व्याकुल बन्यो । कुनै दिशा, कुनै ध्यान, जीवनको लागि कुनै उद्देश्य नभएका मानिसहरू । त्यहाँ त्यस्ता कति जना थिए ? ‘भिडहरू ।’ ख्रीष्टको प्रतिक्रिया के थियो ? आवश्यकता धेरै भएको हुनाले, उहाँले आफ्ना चेलाहरूलाई प्रार्थना गर्न भन्नुभयो कि परमेश्वरले ‘आफ्नो फसलमा खेतालाहरू पठाइदेऊन् ।’ ‘फसलका खेतालाहरू’ भन्ने शब्दमा ध्यान दिनुहोस् । तपाईंले फसलमा जम्मा गर्नको लागि सीमित मात्रै समय पाउनुहुन्छ, अन्यथा तपाईंले त्यो फसल गुमाउनुहुन्छ । येशूले बताउनुभएको मुख्य कुरा, वा यसमा भएको जरुरीपनलाई नबिर्सनुहोस् । तपाईंलाई आफ्नो वरपरका थकित र अलपत्र मानिसहरूप्रति दया देखाउन र तिनीहरूलाई येशूकहाँ ल्याउन हरेक अवसर पक्रन बोलाइएको छ । हिँड्न नसक्ने मानिस मन्दिरको ढोकामा बसेर भिख माग्न थाल्यो । दिनदिनै मानिसहरूको भिड तिनीहरूलाई ध्यानै नदिई हिँडेर जान्थ्यो, तर पत्रुस र यूहन्नाले त्यसरी बेवास्ता गरेनन् (प्रेरित ३:१–१०) हेर्नुहोस्) । जब तपाईं पहिले धेरै पटक बेवास्ता गरेर छोडेको कुनै आवश्यकताद्वारा अचानक उत्प्रेरित बन्नुहुन्छ, त्यसको अर्थ हुन्छ परमेश्वरले तपाईंलाई यसमा संलग्न हुन र यसको बारेमा केही गर्न भनिरहनुभएको छ ।आज आफ्नो वरपर खाँचोमा परेका मानिसहरूप्रति दया देखाउनुहोस् र उनीहरूको निम्ति केही गर्नुहोस् ।
आत्मिक भोजनः मत्ती ६:५–१५ दानिएल ६:१०–२३ याकूब ५:१३–१८ १ थेसलोनिकी ५:१६–१८
The Word for Today is authored by Bob and Debby Gass and published under licence from UCB International Copyright © 2024
