मूर्खझैं देखिन तयार हुनुहोस्

‘बुद्धिमान्हरूलाई शर्ममा पार्न परमेश्वरले संसारका मूर्ख कुराहरूलाई छान्नुभयो ।’ —१ कोरिन्थी १:२७

एक जना पास्टरले लेखेका छन्, ‘सर्वेक्षणहरूले पत्ता लगाएका छन् कि अधिकांश मानिसहरूको पहिलो डर सार्वजनिक रूपमा बोल्ने काम हो । मृत्यु दोस्रो नम्बरमा आउँछ । यसको अर्थ कतिपय मानिसहरू सार्वजनिक रूपमा बोल्नुभन्दा बरु मर्न मन पराउँछन् । किन ? मूर्ख देखिएला भन्ने डरको कारण…तर विश्वास भनेकै मूर्ख देखिने तत्परता हो । मरुभूमिमा जहाज बनाउँदा नोआ मूर्ख देखिन्थे । नब्बे वर्षको उमेरमा बच्चा जन्माउन लुगाकपडा बन्दोबस्त गर्दा सारा मूर्ख देखिइन् । तुरही बजाउँदै यरीहोको वरिपरि घुम्दा इस्राएलीहरू मूर्ख देखिन्थे । गोल्यतलाई घुँएत्रोले आक्रमण गर्दा दाऊद मूर्ख देखिन्थे…ज्ञानी मानिसहरू टाढाको तारालाई पछ्याउँदै जाँदा मूर्ख देखिन्थे । पत्रुस नदीको बिचमा डुंगाबाट बाहिर निस्कँदा मूर्ख देखिए । अनि क्रुसमा अर्धनग्न झुण्डिनुभएका येशू मूर्ख देखिनुहुन्थ्यो । तर विश्वासको सारतत्त्व नै यही हो । ती सबैका र परिणामहरू आफै बोल्छन् । नोआ जलप्रलयबाट बचाइए । साराले इसहाकलाई जन्म दिइन् । यरीहोका पर्खालहरू ढले । दाऊदले गोल्यतलाई पराजित गरे…ज्ञानी मानिसहरूले मसीहलाई भेट्टाए । पत्रुस पानीमा हिँडे । अनि येशू मृतकबाट बौरी उठ्नुभयो..धर्मशास्त्रका सबैभन्दा ठूला सफलताहरू, आश्चर्यकर्महरू, र घुम्ती बिन्दुहरू त्यस्ता व्यक्तिहरूको कारण सृजना भएको पत्ता लगाउन सकिन्छ जो मूर्ख देखिन तत्पर थिए । किन ? धर्मशास्त्रको यो खण्ड पढ्नुहोस् ‘“किनकि मेरा विचारहरू तिमीहरूका विचार होइनन्, र तिमीहरूका चाल मेरा चाल होइनन्,” परमप्रभु भन्नुहुन्छ । “जसरी आकाश पृथ्वीभन्दा अल्गो छ, त्यसरी नै मेरा चाल तिमीहरूका चालभन्दा र मेरा विचार तिमीहरूका विचारभन्दा अल्गा छन्”’ (यशैया ५५:८–९) । त्यसकारण यहाँ तपाईंको छनोट छः सांसारिक विचार र शैलीमा जिउनुहोस् र मानिसहरूद्वारा स्वीकार गरिनुहोस्, वा स्वर्गीय विचार र शैलीमा जिउनुहोस् र परमेश्वरद्वारा स्वीकार गरिनुहोस् । जब तपाईंले यसलाई त्यो दृष्टिकोणबाट हेर्नुहुन्छ, तपाईंको छनोट स्पष्ट छ ।यसकारण संसारको नजरमा मूर्ख देखिए तापनि परमेश्वरको नजरमा विश्वासमा चल्ने व्यक्ति बन्नु बुद्धिमानी हुन्छ ।

आत्मिक भोजनः लेवी २३:३३–४४ यूहन्ना ७:१–३९ जकरिया १४:१६–२१

The Word for Today is authored by Bob and Debby Gass and published under licence from UCB International Copyright © 2024