‘त्यो बन्चरो माथि उत्रँदै निस्क्यो ।’ —२ राजा ६:६
दोस्रो राजा ६ अध्यायले एक जना अगमवक्ताले नदीको छेउमा रूखहरू काट्दै गर्दा तिनको फलामको बन्चरो नदीमा खसेको कुरा बताउँछ । तिनले एलीशालाई भनेः ‘“हे मेरा प्रभु, यो त मागेर ल्याएको बन्चरो पो थियो”’ (पद ५) । तिनले भूतकालको प्रयोग गर्छन् । जहाँसम्म तिनको कुरा छ, त्यो बन्चरो सदाको लागि गइसकेको थियो । तिनीसँग त्यो बन्चरो फिर्ता पाइनेछ भन्ने कुनै आशा छैन । तिनले एलीशालाई त्यो बन्चरो हराएको ठाउँ देखाउँछन् । एलीशाले एउटा लफ्ी काटेर पानीमा फ्याँकिदिन्छन् अनि यस्तो केही कुरा हुन्छ जुन सायद त्योभन्दा पहिले वा पछि कहिल्यै भएको छैन । ‘त्यो बन्चरो माथि उत्रँदै निस्क्यो ।’ ध्यान दिनुहोस्, त्यो जीवन वा मृत्यु भनेजस्तो अवस्था थिएन । हो, त्यो उधारो बन्चरो थियो । हो, त्यो हरायो तर यदि तपाईंले अनुभव गर्नुभएको सबैभन्दा खराब कुरा त्यही हो भने, तपाईंले निकै सुरक्षित जीवन जिउनुभएको छ । तपाईंले यो आश्चर्यकर्मलाई विवाहको भोजमा येशूले पानीलाई दाखमद्यमा परिणत गर्नुभएजस्तै वर्गमा राख्न सक्नुहुन्छ । यदि तिनीहरूले पाहुनाहरूको स्वागतको लागि पर्याप्त दाखमद्य तयार राख्दैनन् भने, दुलहा र दुलहीलाई अप्ठ्यारो हुनबाट जोगाउनको लागि प्रभुले आफ्नो पहिलो आश्चर्यकर्म किन खर्चनु हुने ? यसले परमेश्वरको बारेमा केही कुरा प्रकट गर्छ । उहाँले स–साना कुराहरूमा चासो राख्नुहुन्छ, जस्तै विवाहको स्वागत र उधारो लिइएको बन्चरो । हाम्रा महान् परमेश्वरको लागि कुनै पनि कुरा धेरै ठूलो छैन अनि उहाँको लागि कुनै पनि कुरा अति सानो पनि छैन । ‘तिमीहरूका सारा फिक्री उहाँलाई सुम्पिदेओ, किनकि उहाँले तिमीहरूको वास्ता गर्नुहुन्छ’ (१ पत्रुस ५:७) । यहाँ ‘तिमीहरूका सारा फिक्री’ भन्ने शब्दहरूमा ध्यान दिनुहोस् । यदि यो तपाईंको लागि महत्वपूर्ण छ भने, यो तपाईंका प्रेमिला स्वर्गीय पिताको लागि पनि महत्त्वपूर्ण छ । ‘आफ्ना सारा मार्गमा उहाँलाई सम्झी, र उहाँले तेरा मार्गहरू सोझा तुल्याइदिनुहुनेछ’ (हितोपदेश ३:६) । यहाँ ‘आफ्ना सारा मार्ग’ भन्ने शब्दहरूमा ध्यान दिनुहोस् । यसकारण आज परमेश्वर तपाईंले आफ्नो जीवनको हरेक विवरण उहाँसँग बाँडचुँड गरेको चाहनुहुन्छ ।
आत्मिक भोजनः इजकिएल २७:२५–३०:२६ मर्कूस १५:३३–४७ भजन १४३ हितोपदेश १५:८–१०
The Word for Today is authored by Bob and Debby Gass and published under licence from UCB International Copyright © 2024
